Azərbaycan Respublikası Müdafiə Sənayesi Nazirliyinin (MSN) Yoqa İdman Klubunun və Klassik Yoqa Məktəbinin birgə təşkilatçılığı, Hindistanın ölkəmizdəki səfirliyi və  Azərbaycan Velosiped Federasiyasının (AVF) dəstəyi ilə Beynəlxalq Yoqa Günü münasibəti ilə keçirilən növbəti açıq yoqa dərsi iyunun 21-də Bakı Bulvarında təşkil edilib.

Açılış nitqi ilə çıxış edən Hindistanın Azərbaycandakı səfiri Sridharan Madhusudhanan tədbir iştirakçılarını Azərbaycan dilində salamlayaraq xoş arzularını çatdırıb və qeyd edib ki, bu yoqa dərslərinin iştirakçıları Hindistanla Azərbaycan arasında dostluq körpüsüdürlər.

Bundan sonra yoqa təlimi üzrə mütəxəssis, klasik yoqa məktəbinin təsisçisi Elçin Quliyev, “Art of living” təşkilatının rəhbəri Kənan Məmmədov və yoqa müəllimi İradə Əliyevanın təqdimatında açıq yoqa dərsinə başlanılıb.

Açıq hava məkanında baş tutan dərsdə MSN-in Yoqa İdman Klubunun, Klassik Yoqa Məktəbinin və AVF-nin üzvləri, həmçinin həvəskarlar iştirak ediblər. Tədbirə ümumilikdə 200-ə yaxın iştirakçı qatılıb.

Hatha yoqa praktikası ilə başlayan açıq dərs musiqili proqram ilə davam etdirilib.

Sonda iştirakçılara vegetarian yeməkləri təqdim edilib.

Qeyd edək ki, BMT Baş Assambleyasının 2014-cü ildə yekdilliklə qəbul etdiyi qərarla iyunun 21-i Beynəlxalq Yoqa Günü elan edilib.