Şose velosipedi üzrə yeniyetmələrdən ibarət Azərbaycan milli yığma komandası Sloveniyanın Maribor şəhərində keçirilən XVII Avropa Gənclər Yay Olimpiya Festivalında (EYOF) mübarizəyə başlayıb. İdmançılarımız iyulun 25-də fərdi ötüşmə növündə güclərini sınayıblar.

Maribor Hava Limanının ərazisində təşkil edilən yarışda həm qızlar, həm də oğlanlar 10 km məsafə qət ediblər.

79 idmançının qatıldığı qızların mübarizəsində milli komandamızın üzvlərindən Məryəm Əfqanzadə (00:15:25,17) 30-cu, Ayan Məmmədzadə (00:16:44,13) 71-ci, Xədicə Nabatzadə (00:17:43,71) 79-cu yerdə qərarlaşıblar.

Yarışın qalibi isə niderlandlı idmançı Megan Arens (00:14:24,66) olub.

90 velosipedçinin iştirak etdiyi oğlanların yarışında idmançılarımızdan Artyom Proskuryakov (00:14:04,95) 59-cu, Ravi Rzayev (00:14:37,98) 81-ci, Turqut Qurbanlı (00:15:27,98) 84-cü yerlə kifayətləniblər.

Niderland təmsilçisi Gijs Schoonvelde (00:12:52,89) isə qızıl medal qazanıb.

İdmançılarımız iyulun 27-də qrup ötüşməsi növündə mübarizə aparacaqlar.

Qeyd edək ki, ölkəmiz EYOF-da dağ velosipedi yarışında da təmsil olunur. İyulun 26-da milli komandamızın üzvü Maksim Polikarpov "cross country" növü üzrə mübarizəyə qatılacaq.