Bakı Gənclər Mərkəzinin üzvləri arasında velosiped yarışı keçirilib
24 avqust, 2022 15:59
Avqustun 24-də Azərbaycan Velosiped Federasiyasının təşkilatçılığı ilə Bakı Gənclər Mərkəzinin üzvləri arasında velosiped yarışı keçirilib. Respublika Velotrekində baş tutan yarışda 15-18 yaş kateqoriyasında və 19 yaşdan yuxarı 26 oğlan, 1 qız həvəskar velosipedçi mübarizə aparıb. Yarış trekində 1 dairəni ən tez başa vuran iştirakçılar mükafatçılar sırasında yer alıblar.
15-18 yaş kateqoriyasında Orxan Babanlı 1-ci, Ümid Cabbarlı 2-ci, Qəzənfər Məmmədov 3-cü yerə layiq görülüblər.
19 yaşdan yuxarı velosipedçilər arasında isə Cavid Əliyev hamıdan yaxşı nəticə göstərərək 1-ci yerə çıxıb. Onun ən yaxın izləyicisi Adil Məcidov olub və 2-ci yerdə qərarlaşıb. Elmir Musayev isə 3-cü yerlə kifayətlənib.
Qaliblərə Azərbaycan Velosiped Federasiyasının Baş katibi Elnarə Musayeva medallar və sertifikatlar təqdim edib.
