Ulu Öndər Heydər Əliyevin layiqli davamçısı olan Azərbaycan Respublikasının Prezidenti cənab İlham Əliyevin rəhbərliyi ilə ölkəmizdə idmanın inkişafı istiqamətində mühüm tədbirlər həyata keçirilir. Bu istiqamətdə aparılan uğurlu dövlət siyasətinə dəstək məqsədilə avqustun 28-də Azərbaycan Respublikası Gənclər və İdman Nazirliyi və Azərbaycan Velosiped Federasiyasının təşkilatçılığı ilə Bakı Konqres Mərkəzinin qarşısında "İdman hamı üçün" layihəsi çərçivəsində növbəti veloyürüş keçirilib.

Şəhər sakinlərinin böyük marağına səbəb olan yürüşdə 80-dək peşəkar və həvəskar velosipedçilər iştirak ediblər. Yürüş iştirakçıları bir saat müddətində Mərkəzin qarşısındakı parkın ətrafında dairəvi hərəkət ediblər. Bakı sakinləri veloyürüşdə fəallıq göstəriblər.Azərbaycan Velosiped Federasiyasının peşəkar idmançıları isə parkda nümunəvi hərəkətlər nümayiş etdiriblər.

Qeyd edək ki, kütləvi idman tədbirinin təşkilində əsas məqsəd əhali, xüsusən də uşaq və gənclər arasında velosiped idmanına marağın artırılması, sağlam həyat tərzinin təbliğidir.