Noyabrın 4-də Azərbaycan Milli Olimpiya Komitəsinin (MOK) 30 illik yubileyinə həsr olunmuş İdman Filmləri və Proqramları Milli Televiziya Festivalının qaliblərinin mükafatlandırma mərasimi keçirilib.

Rəşid Behbudov adına Azərbaycan Dövlət Mahnı Teatrında baş tutan mərasimdə dövlət rəsmiləri, MOK-un, idman federasiyalarının rəhbər şəxsləri, olimpiya çempionları, tanınmış idmançılar və media nümayəndələri iştirak ediblər.

Tədbirdə 4 nominasiya üzrə qaliblərə münsiflər heyətinin və festivalın təşkilat komitəsinin mükafatları təqdim olunub.

Münsiflər heyətinin qərarına əsasən, "Həyat naminə - İdman" nominasiyasında Azərbaycan Velosiped Federasiyasının və “Vətən” İctimai Birliyinin birgə layihəsi olan “Hərəkətə keç” proqramının “Əziz Şuşa” beynəlxalq velosiped yarışından bəhs edən buraxılışı birinci yerə layiq görülüb.

Milli Olimpiya Komitəsinin vitse-prezidenti, Olimpiya çempionu, Festivalın münsiflər heyətinin sədri Zemfira Meftahətdinova və Azərbaycan idman jurnalistikasının ən tanınmış nümayəndələrindən olan İdman TV-nin baş redaktoru Aydın Əliyev “Vətən” İctimai Birliyinin rəhbəri Zəhra Quliyevaya mükafatları təqdim ediblər.

Qeyd edək ki, Festivala dövlət, özəl televiziya kanalları, prodakşn studiyaları, idman federasiyaları və kommersiya şirkətləri tərəfindən 2020-2022-ci illərdə istehsal edilmiş, idmanın və idmançıların təbliğinə həsr olunmuş çox sayda filmlər, proqramlar, reklam çarxları və musiqili kliplər təqdim olunub. 

Qaliblər “Güclü, iradəli” (idman və idmançılara həsr olunmuş sənədli və bədii filmlər), “Həyat naminə - İdman” (idman haqqında proqramlar və idman yarışlarının nümayişi), idmanı və idmançıları təbliğ edən reklam və promoçarxları, “klip” nominasiyaları üzrə müəyyənləşib.