Mayın 14-də Özbəkistanda Beynəlxalq Velosipedçilər İttifaqının (UCİ) 1.2 kateqoriyalı birgünlük "Tour of Bostonliq II" yarışı keçirilib. 

Azərbaycanın kişilərdən ibarət Elit/U23 milli yığma komandasının da mübarizə apardığı beynəlxalq turnirdə idmançılar şose velosipedinin qrup ötüşməsi üzrə güclərini sınayıblar.

Yeddi ölkədən 11 komandanın tərkibində 54 idmançının iştirak etdiyi yarışda velosipedçilər 130 km məsafə qət ediblər.

Milli komandamızın üzvlərindən Musa Mikayılzadə 3 saat 36 dəqiqə 16 saniyə nəticə ilə 13-cü yerə layiq görülüb.

Digər idmançılarımızdan Kamran Mirzəxanov (03:41:18.35) 29-cu, Nəcəf Bağırov (03:41:57.75) 32-ci, Şahin Eyvazov (03:43:35.18) 37-ci, Mikayıl Səfərli (03:48:48.79) 45-ci, Samir Cəbrayılov (03:49:39.31) 47-ci, Yusif İsmayılov (03:50:20.83) 49-cu, Aqşin Bağırlı (03:50:20.98) isə 50-ci yerdə qərarlaşıblar.

Yarışın qalibi 3 saat 34 dəqiqə 21 saniyə nəticə ilə Qazaxıstan milli komandasının üzvü İlkhan Dostiyev olub.

Qeyd edək ki, beynəlxalq turnirdə Azərbaycan, Qazaxıstan, Küveyt, Yunanıstan, Filippin, Tayland və Özbəkistanı təmsil edən komandalar iştirak ediblər.