Polşalı motoyürüşçülər Azərbaycanda qonaqpərvərliklə qarşılanıblar
27 iyun, 2023 17:24
Polşadan start götürərək motoyürüşə başlayan 24 motosikletçi iyunun 27-də Azərbaycana gəliblər.
Müdafiə Sənayesi Nazirliyinin (MSN) Motosiklet İdman Klubu, "Busamania" və "Motozone" Motoklublarının üzvləri qonaqları qarşılayaraq Bakıda onlarla birlikdə yürüşə qatılıblar.
Motosikletçilər Bibiheybət qəsəbəsi ərazisindən başlayaraq şəhərin mərkəzi ilə hərəkət edib, daha sonra Fatmayı qəsəbəsinə doğru irəliləyiblər. Onlar burada Bakıdakı yürüşü başa vurublar.
Olduqları bütün ölkələrdə motoyürüşlər keçirən polşalı motosikletçilər bildiriblər ki, onlar Polşadan başlayaraq hava yolu ilə Özbəkistana, oradan Qazaxıstana və dəniz yolu ilə Azərbaycana daxil olublar.
Onlar buradan Gürcüstana gedəcək, daha sonra Türkiyə, Yunanıstan və Albaniyada olacaqlar. Motosikletçilər yürüşü İtaliyada başa vuracaqlar.
Qonaqlarla müxtəlif mövzularda fikir mübadiləsi aparılıb, MSN-in Motosiklet İdman Klubu ilə əməkdaşlıq edən "Garage 011" texniki servis xidməti tərəfindən onların motosikletlərinə texniki dəstək göstərilib.
Motoyürüşçülərə Bakıda qalmaq, buranın gəzməli-görməli yerlərində olmaq üçün bütün lazımi şərait yaradılıb və ekskursiya təşkil edilib.
Polşalı motosikletçilər Azərbaycanda qonaqpərvərliklə qarşılandıqlarını, burada olmaqdan məmnunluqlarını bildiriblər.
Qeyd edək ki, motoyürüşçülər Azərbaycandan Gürcüstana iyunun 28-də keçəcəklər.
