“Sağlam gənclik” layihəsi Şəmkirdə
29 oktyabr, 2019 14:44
Şəmkir rayonunda Azərbaycan Gənclər Fondu və Azərbaycan Velosiped İdmanı Federasiyasının təşkilatçılığı, Şəmkir Rayon İcra Hakimiyyətinin dəstəyi ilə “Sağlam Gənclik” layihəsinə start verilib. Layihənin keçirilməsində əsas məqsəd gənclərin sağlam həyat tərzinə cəlb olunmasını təmin etmək, ekoloji sağlam həyatın inkişafına dəstək verməkdir.
Gənclərin veloyürüşü ilə başlayan layihədə 1000-ə yaxın gənc iştirak edib. Şəmkir rayonu Bayraq Meydanından start verilən yürüşdə velosipedçilər şəhər mərkəzi ilə dövrə vuraraq Bayraq Meydanında finiş xəttinə çatıblar.
Veloyürüşdə çıxış edənlər velosiped idman növünün sağlamlıq üçün əhəmiyyətindən, regionlarda yaşayan gənclərin bu idman növünə cəlb edilməsinin vacibliyindən danışıblar. Tədbir zamanı gənclərə əyani olaraq velosiped üzərində praktiki təlimlər keçirilərək müzakirələr aparılıb, onları maraqlandıran suallar cavablandırılıb. Həmçinin Şəmkir rayon Gənclərin İnkişaf və Karyera Mərkəzində yeni yaradılan veloklubda texniki ləvazimatlar və velosipedlər gənclərin ixtiyarına verilib.
