Azərbaycan Velosiped Federasiyası və “Vətən” İctimai Birliyinin təşkilatçılığı, Gənclər və İdman Nazirliyi və Müdafiə Sənayesi Nazirliyinin dəstəyi ilə ərsəyə gəlmiş "Uğurlar - Elçin Əsədov" bioqrafik qısametrajlı filmi Azərbaycanda 2022-ci ilin ən yaxşı idman filmi seçilib.

Film ilin idman yekunları ilə əlaqədar Gənclər və İdman Nazirliyində yaradılmış komissiyanın rəyi, Milli Olimpiya Komitəsinin, idman federasiyalarının təklifləri (70 faiz), sosial media vasitəsilə izləyicilərin səsi (30 faiz) əsasında 2022-ci ilin ən yaxşılarının seçimi üzrə keçirilən sorğuda “2022-ci ilin idman filmi” nominasiyasında 1-ci yerə layiq görülüb.

Gənclər və İdman Nazirliyinin “Buta Palace” sarayında təşkil etdiyi "İlin idman yekunları" adlı qala mərasimdə "Uğurlar - Elçin Əsədov" filminin ssenari müəllifi Zəhra Quliyevaya mükafat təqdim olunub. Filmin qəhrəmanı Elçin Əsədov da səhnəyə çıxaraq, mükafatçılarla birlikdə təbrikləri qəbul edib. Mükafatı Azərbaycan Dövlət Turizm Agentliyinin sədri, Azərbaycan Qış İdman Növləri Federasiyasının prezidenti Fuad Nağıyev təqdim edib.

Nəzərinizə çatdıraq ki, “Əvvəl və sonra” filmi (Kifayət Qasımova) 2-ci, “Sağlamlıq idmandan, idman isə gimnastikadan başlayır” filmi (Azərbaycan Gimnastika Federasiyası) isə 3-cü yerdə qərarlaşıb.

Qeyd edək ki, velosiped idmanı üzrə Azərbaycanın Elit yığma komandasının kapitanı, “Sakarya BB Pro Team” klubunun üzvü, bir çox yerli və beynəlxalq turnirlərin, o cümlədən "Əziz Şuşa” beynəlxalq velosiped yarışının qalibi Elçin Əsədovun həyatına və idman karyerasına həsr olunmuş "Uğurlar - Elçin Əsədov" filmi bioqrafik müsahibə janrında çəkilib. Real faktlara əsaslanaraq ərsəyə gətirilən ekran işində tamaşaçılara E.Əsədovun hansı çətinliklərdən keçərək bu gün də velosiped idmanı sahəsində olmasını əks etdirən hadisələr təqdim olunur.

"Uğurlar - Elçin Əsədov" filminin rejissoru Aslan Qarayev, montajçısı Polad Elmanoğludur.