Mayın 13-də Özbəkistanda Beynəlxalq Velosipedçilər İttifaqının (UCİ) şose velosipedinin fərdi ötüşmə növü üzrə 1.2 kateqoriyalı "Tour of Bostonliq I" yarışı keçirilib. 

Yeddi ölkədən 11 komandanın tərkibində ümumilikdə 59 velosipedçinin iştirak etdiyi yarışda idmançılar 30 km məsafə qət ediblər.

Beynəlxalq turnirdə mübarizə aparan Azərbaycanın kişilərdən ibarət Elit/U23 milli yığma komandasının üzvlərindən Musa Mikayılzadə (00:39:29) 18-ci, Kamran Mirzəxanov (00:39:56) 21-ci, Samir Cəbrayılov (00:41:01) 25-ci, Nəcəf Bağırov (00:42:15) 33-cü, Şahin Eyvazov (00:43:36) 43-cü, Yusif İsmayılov (00:45:07) 50-ci, Aqşin Bağırlı (00:45:08) 51-ci, Mikayıl Səfərli (00:47:35) isə 57-ci yerdə qərarlaşıblar.

Yarışın qalibi 36 dəqiqə 29 saniyə nəticə ilə Qazaxıstan milli komandasının üzvü Daniil Marukhin olub.

Qeyd edək ki, beynəlxalq turnirdə Azərbaycan, Qazaxıstan, Küveyt, Yunanıstan, Filippin, Tayland və Özbəkistanı təmsil edən komandalar iştirak ediblər.

Nəzərinizə çatdıraq ki, milli komandamız mayın 14-də "Tour of Bostonliq II" yarışında şose velosipedinin qrup ötüşməsi növü üzrə mübarizə aparacaq.