Velosipedçimiz Avropa çempionatında çıxışını başa vurub
11 fevral, 2023 10:10
Azərbaycanın Elit yığma komandasının üzvü Musa Mikayılzadə İsveçrədə keçirilən velosiped idmanının trek növü üzrə Avropa çempionatında çıxışını başa vurub.
Qrenxendə yerləşən velodromda təşkil edilən çempionatda qitənin ən güclü velosipedçiləri ilə yarışan idmançımız fevralın 9-da xallar üzrə qrup ötüşməsində gücünü sınayıb. 160 dövrədən (40 km) ibarət yarış gərgin idman mübarizəsi şəraitində keçib. Nəticələrə əsasən, velosipedçimiz 20-ci yerlə kifayətlənib.
İtaliyalı idmançı Consonni Simone (54 xal) hamıdan yaxşı nəticə göstərərək qızıl medal qazanıb.
M.Mikayılzadə fevralın 10-da skretç üzrə mübarizəyə qatılıb. 60 dövrədən ibarət (15 km) yarışı idmançımız tamamlaya bilməyib.
Böyük Britaniyalı velosipedçi Wood Oliver isə birinci yerə layiq görülüb.
Xatırladaq ki, yığma komandamızın üzvü fevralın 8-də çıxmaqla qrup ötüşməsində iştirak edib və turnir cədvəlinin 20-ci pilləsində yer alıb.
