Avqustun 11-də Türkiyənin Konya şəhərində keçirilən V İslam Həmrəyliyi Oyunlarında Azərbaycanın Elit/U23 yığma komandasının üzvləri şose velosipedinin fərdi ötüşmə növü üzrə yarışlarda iştirak ediblər. Kişilər arasında Elçin Əsədov, qadınların mübarizəsində isə Viktoriya Sidorenko və Lalə Əbdürəhmanova güclərini sınayıblar.

Meram Dutlukır ərazisində keçirilən yarışda kişilər 25 km, qadınlar isə 15,9 km məsafə qət ediblər.

Yarışların nəticələrinə əsasən, E.Əsədov (32:06.388) 12-ci, V.Sidorenko (25:02.882) 9-cu, L.Əbdürəhmanova isə (26:38.380) 11-ci yerdə qərarlaşıblar.

Qeyd edək ki, avqustun 13-də idmançılarımız şose velosipedinin qrup ötüşməsi növü üzrə mübarizə aparacaqlar.

Avqustun 9-da rəsmi açılışı olan V İslam Həmrəyliyi Oyunlarında baş məşqçilər Asif Həsənov (şose üzrə) və Elçin Qəhrəmanovun (trek üzrə) rəhbərliyi ilə kişi velosipedçilərdən Elçin Əsədov, Nəcəf Bağırov, Əmral Abduləzizli, Əli Qurbanov, Musa Mikayılzadə, Şahin Eyvazov, Elgün Əlizadə, qadın velosipedçilərdən isə Viktoriya Sidorenko, Ayan Xankişiyeva və Lalə Əbdürəhmanova iştirak edirlər.

56 ölkədən 4200 idmançının qatıldığı Oyunların bağlanış mərasimi avqustun 18-də baş tutacaq.