Beynəlxalq yoqa günü münasibəti ilə iyunun 7-də Azərbaycan Respublikası Müdafiə Sənayesi Nazirliyinin Yoqa İdman Klubunun və Klassik Yoqa Məktəbinin birgə təşəbbüsü və təşkilatçılığı, Azərbaycan Velosiped Federasiyasının dəstəyi  ilə «Atəşgah məbədi” Dövlət Tarix-Memarlıq Qoruğunda  yoqa dərsi keçirilib.

Start verilmiş açıq yoqa dərslərinin 2-ci mərhələsində sözügedən klubun və məktəbin üzvlərindən, eləcə də cəlb olunmuş həvəskarlardan ibarət ümumilikdə 150-yə yaxın şəxs iştirak edib. 

Hatha yoqa praktikası ilə başlayan tədbir musiqili proqram ilə davam etdirilib. Sonda iştirakçılara vegetarian yeməklər təqdim edilib.

“Yoqa sağlam həyat tərzinin realizəsi vasitəsidir” mövzusunda keçirilən açıq yoqa dərslərinə qısa müddət ərzində iştirakla bağlı çoxsaylı həvəskarların müraciətləri nəzərə alınaraq festival müddətində kütləvilik məqsədilə paytaxtın mərkəzi meydanlarında açıq yoqa dərslərinin davam etdirilməsi nəzərdə tutulur.

Qeyd edək ki,  BMT Baş Assambleyasının 2014-cü ildə yekdilliklə qəbul etdiyi qərarla iyunun 21-i Beynəlxalq Yoqa Günü elan edilib.